Svineinfluensa

Eg er ikkje blitt ramma, enno.
Mi kjære lille Sylvia ringde meg ein dag og ville finne på noko no før eg fekk svineinfluensa. Det var då optimistisk av henne.

Me har hatt tilfelle i gruppa og i dag kjende eg meg ikkje bra rett før matpausa. Låk i haudet og litt slapp. Nesten litt kvalm òg. I dag tidlig hosta både PK og meg. Men etter ei brødskive og litt frisk luft (også kalla inspeksjon) kom det seg.

Men likevel behandlar eg meg sjølv no i kveld som om eg var sjuk. Sov litt middag, drikk kakao og slappar av med pledd :)

Håper eg slepp dette greiene her. Lurer på å vaksinere meg, men dei gongane eg prøver å ringe, kjem eg ikkje gjennom. Er sikkert fleire som tenker det samme som meg desse dagar. Me skal visst få vaksine på jobb, men det er ikkje før om nokre veker, så me får sjå.

treige nettsider.

Ein dag me skulle laste ei nettside (og eg forklarte at ein kunne følge med på dei grøne strekane) utbraut ein elev:
Åh, det går jo treigere enn en togfører som kjører båt.

Ein draum

Her er eit døme på irriterande draum:

Eg drøymde at ein dag etter eit friminutt sat det ei faddergruppe i klasserommet vårt og ville gje sjokolade til dei elevane som var i si faddergruppe. Det var sånn pose med troikabitar og andre bitar, om de skjøner. Eg blei litt irritert sidan me ikkje hadde avtalt dette på førehand og gjekk opp i andre etasje for å finne lærarane deira. Der var ingen. Så gjekk eg til biblioteket for å spørje om bibliotekaren visste kvar 5.trinnet var.
- Nei dei er ikkje på skulen i dag.
Men tydelegvis var tre elevar nede hjå oss. Så stod ressurslærar der også. Dei heldt visst på å rydde på biblioteket.
- Vil du ha denne fine fyrstikkdåsen, Kari? No som det er snart advent og greier.
Eg kjende meg ikkje i humør til å få nokon fyrstikkdåse, så eg takka nei så pent eg kunne:
- Eh.. veit ikkje.
Så gjekk eg ned att. På veg møtte eg fleire av elevane mine. Dei var overalt, både ute og inne.
Klokka var blitt 1305 og det var berre 10minutt igjen av heile timen.

Korleis det gjekk med sjokoladen, veit eg ikkje, men at eg hadde sløsa vekk ein heil time visste eg.

Slike draumar har altså lærarar (jaffal meg)

Edvard Grieg

Dette stykket er det ein mann som heiter Edvard Grieg som har laga.
- Han kjenner jeg. Det er han som har den Halloween-sangen!

Klasseregler

- Hva er egentlig en regel?
- Det er noe de voksne sier at vi skal gjøre.
- Det kan jo også være barn som lager reglene. Kan du si meg en regel vi har?
- At det ikke er lov å plystre i klasserommet.
- Hva hadde skjedd om vi ikke hadde regler da?
- Da hadde det vært lov å plystre.

Her kjem eit til

I dag sat ein av gutane mine på golvet i garderoben. Det hadde vore mykje styr med sekkane. Det viste seg at elev a hadde teke sekken til elev b, som hadde teke sekken til elev c, som hadde teke sekken til elev a etter me hadde leika ved kyrkja i dag. Guten sat altså på golvet med sekken sin. Det hadde regna og han heldt på å pakke ned det gule trekket ein kan ha utanpå sekken sin når det regnar (det var nok difor elevane hadde teke feil sekkar på veg heim også). Medan han sat der såg han opp på meg og sa: "Jeg lurer på hva man egentlig skal med en rektor".

Gullkorn frå ein 1. klassing

Det er svært gildt å ha skulen så nær kyrkja og kyrkjgarden. Det er meir filosofiske seksåringar som går over ein kyrkjegard enn dei som gjeng over ei fotballbane eller eit lyskryss.

"Se på alle de fine begravelsene"
"Se, det må være begravelsen til Jesus, for det er sånn kors på"
Ei som forstod at det ikkje var Jesus sin begravelse (grav) lurte på kvar begravelsen til Jesus eigentleg var.
Seinare sa ho det beste:

"Oppe i Himmelen, der hvor Jesus og Gud - og foreldrene deres - bor, der er det veldig fint."

Eg er svært takksam for å ha kyrkjegarden så nær skulen. I fjor sa ein av andreklassingane mine:
"De derre korsene er sikkert litt billigere" (han meinte dei trekorsa som stend på grava før steinen er komen på plass"

Er det nokon prestar som les? Eg har eit råd til skulegudstenestene. Heng opp salmane som vert brukt på tavla framme. Elevane spør kva den er til. Keisamt å svare "På ei VANLEG gudteneste heng nr på salmane der" eller "det er salmane frå den SKIKKELEGE gudstenesta som var på søndag". Er de med, prestespirane der ute?

Ha ein fin dag

Oioioi

Blogginspirasjon blogginspirasjon...

Hei, no var det lenge sidan. Eg har ikkje vore på ferie til no. Turen varte i tre dagar. Bilete kjem (kanskje). Eg har ikkje vore så mykje på nettet i det siste. Det har ikkje vore heilt tilgjengeleg her heime. Me har hatt ei datamaskin som virka, men der har ikkje internett virka. Og den dataen der internett virka, tok seg ei velfortent pause. Men no har me eit litt ustabilt kasus som kan klare litt facebook og litt blogging innimellom. Elles har eg nett på jobb, men der er det anna å ta seg til.

Fyrsteklassingane kjem på mandag. Då skal dei ha alle skrivebøker, meldingsbøker, navneskilt i alle variantar og diverse på veggane, halvårsplanar og periodeplanar til undervisninga, rett antal pultar og stolar rett plassert og jammen skal ikkje klasserommet vere fint og triveleg og læraren budd også. Så eg har hatt å gjort denne veka, for å seie det slik. Eg har laminert, klipt, laminert, limt, stifta, laminert, kopiert (både i farge og svart/kvitt) og sa eg laminert? Men eg gler meg. Eg fekk det minste klasserommet, men om elevane sit roleg, har me god plass der inne. Det vert koseleg.

I kveld har eg sett sex and the city - the movie, og gret i lag med dei, jentene eg har vorte så glad i i det siste. Men eg er ikkje trygg på han der Big. No good. Menmen.

Me snakkast, adios amigos

Ferie

Då tek eg mannen min og puttar han inn i bilen og så køyrer me, tja, sørover? Me har med telt, stormkjøkken og div. Det blir kjekt.

Bilete kjem.

Helsing ferietausa.

(Og til dei som no vil bryte seg inn i huset mitt, så er ikkje det så lurt. Eg seier ikkje meir...)

Margin

- No er det kø bak deg, Kari.
- Ja, men eg køyrer jo i 60, så då må dei berre tåle det.
- Ja, men speedometeret viser 7-10 over, så du kan trygt halde 70, for då køyrer du i ca 60 og polititet kan ikkje ta deg på det, for dei må rekne ein margin på pluss minus...

Korleis skal ein vite kor mykje speedometeret skal vise når ein køyrer i 60-sona då? Kanskje må nokon lage ein formel: Det speedometeret viser + det speedometeret viser for mykje delt på kvadratrota av marginen politiet opererer med +/-.



Fyrste gong eg høyrde om speedometer som viste noko over, var i ein gammal opel ascona. Stakkars bilen, tenkte eg. Ja, han har tent oss menneske godt gjennom ei årrekke. Me får vel bere over med skavankane, tenkte eg.

Men sannheita er at dei aller fleste bilar viser over. Og kvifor? Er det fordi det er vanskeleg å lage nøyaktige målarar? Nei, det er fordi me skal ha ein margin når politiet stend og luskar i buskene med instrumentet sitt.

Dei kan starte med å lage korrekte (som råd) speedometer på bilane, slik at folk kan få forhalde seg til realitetane. Då kan politiet gje bøter til dei som køyrer 61 i 60-sona.

Det er akkurat som dei som stiller klokka to-fem minutt fram, for då trur dei at dei rekk bussen.

Eg likar ikkje ordet margin. Ordet margin er for folk som ikkje klarer å forhalde seg til realitetane.

Sommarferie

I dag sit PK og arbeider med minneord, talar, andakter og salmesetlar. Eg, derimot, har ferie. Men kva skal ein finne på? Eg har ikkje bil, så eg kan ikkje køyre nokon stad. Og her i bygda må ein nesten ha bil for å kunne fare ein stad. Vêret er ikkje dårleg, men det er liksom ikkje bra heller. Eg trur eg må finne på noko innandørs. I går rydda eg litt i ting som ligg her hos mamma og pappa. Men det vil eg ikkje i dag. Kanskje eg må strikke noko? Det er ganske praktisk å lage julegåvene no. Det er no ein har tid.

Men det er deilig med sommarferie og då. Det å ikkje ha noko å gjere er eit godt teikn eigentleg:)

GUL

Eg er tante. Til ein fugl, altså. Ein fin nympeparakitt som heiter Gul. Gul har budd hos oss i Hovdebygda nokre dagar medan systra mi og mannen hennar har vore på ferie. I dag skal Gul heimatt. Det gler han (ho?) seg til. Det vert tomt utan Gul. Men gulen vil nok helst heim.

Hade, Gul!

Biletet er litt dårleg. Gul tykkjer ikkje det er så kjekt å stå på utstilling og blitzen gjer han litt skvetten. Men dette er altså Gul.

Brukthandelen min

Eg er glad i loppemarked, bruktbutikkar og liknande. Her ein dag var eg på min faste butikk (secret, secret) og sjå på dei tøffe tinga eg fann:

Dette er ølbrikker. Hehe.. Dei er kjempetøffe. Dei hadde ei heil øskje på butikken. Mannen spurde om eg samla. Nei, sa eg. Men at eg kanskje kunne byrje. Tvilar på det, men dei var i alle fall tøffe. Dei er i papp altså, så det er nok eingongsbrikker.

Den lille. Boksa er kanskje 7cm høg, og det tøffaste (og eklaste) er at det er vaniljesukker oppi boksa. Hehe.. eg anar ikkje kor gammal ho er. Eg kan ikkje hugse dei så små, men ho treng ikkje vere så gammal likevel. Nokon som veit?

Her er alt saman. Eg har fått dilla på gamle sigaøskjer. Eller andre liknande boksar og ting. Mamma og Pappa er på marked i Sverige i dag, og eg ønskte meg boksar. Spent på kva dei finn.

Vekta mi

Eg har jobba eit halvt år no som lærar. Då me skulle rydde klasserom, kontorpultar og arbeidsrom til sommaren, hadde eg ikkje så mykje som mange av dei andre eg jobba saman med. Det var difor kjekt å sjå på alt rot og skrot dei hadde samla oppgjennom åra.

-Vil du ha en vekt? Høyrde eg ein dag me satt å rydda. Det var E, ei dame som eg har jobba på team med no. Ho har vore i bransjen lengre enn eg har levd. Eg ville gjerne ha ei vekt :)

Så søt vekt eg fekk :)

Helgehornet 623 moh

Helgehornet er det dominerande fjellet nokre få km nord for E39 mellom Volda og Ørsta. Helgehornet er eit svært populært turmål, då det er lett tilgjengeleg, og byr på flott utsikt i alle retningar. Vanlegast er det no å køyre opp til skytebana i Sollidalen (ca 270 moh), og gå derifrå etter tydeleg merka sti. Det er også mogleg, men noko lenger, å køyre eller gå skogsveg som startar ved Hovdevatnet, og deretter gå merka sti.
På toppen er det ei radio/TV/kommunikasjonsmast.
Henta frå «http://nn.wikipedia.org/wiki/Helgehornet»

"Det er også mogleg, men noko lenger, å gå skogsveg blabla". Den ruta gjekk eg :)

I går var eg altså på Helgehornet. Det er Fjellet med stor F. Eg er einig at det er eit lite fjell, men det er eit lite, søtt fjell. Det er mitt fjell.

Eg gjekk åleine. PK var ikkje tilgjengeleg og hunden er vorten så sjukt gammal at eg torde ikkje dra han med.

Målet:

Skogsvegen var tiltider svært bratt. Noko som ikkje kjem fram på biletet.

Her er steinen eg tok den fyrste pausa på. Eg åt her eit eple.

Her er utsikt over Volda:
Men Ørsta er finast:

Det som er så greitt med Helgehornet er at ein får veldig bra utsikt etter ikkje så altfor lang tur. Eg kjenner i kneet i dag at eg var på fjellet i går. Kneet mitt er ikkje så glad i å gå på fjellet det. Men augene mine likar det kjempegodt.

Ullemi

Hei igjen
Mamma har ein hobby der ho lagar ullfigurar med ein teknikk ein kallar nålefilting. Det er rett og slett toving av ull utan vatn og anna griseri. Mamma har vist meg korleis ho lagar figurar. Det tek nok for alltid før eg kjem opp på same nivå som henne, men eg kosar meg stort med desse figurane. Her er nokre bilete av det eg har laga i sommar:






På grisane og nissane har eg brukt kakeformer og stappa ulla nedi og stukke og stukke med nåla til det vart tova. Etterpå pynta eg figurane med ull. Det er skikkeleg kjekt.

Den øvste snømannen fekk mamma og pappa med meg (føler meg som sju år gammal igjen), men den nederste vil eg ha sjølv ;) Her rullar eg saman ull og stikk her og der og formar ulla slik eg vil ha henne. Julekrybbefigurane nedanfor er laga på same måten.

På bloggen til Mamma kan de sjå figurane hennar og lese meir om teknikken.

Velkomen skal du vere

Dette er min nye blogg. Gøy? Eg la ned den gamle. Slik er det. Brått vert ein vaksen og får andre behov. Denne bloggen vil eg fylle med rusk og rask. Det kjem til å vere ei blanding av handarbeid, bibelanekdotar, bilete og diverse frå hlivet.

Eg håper på mykje respons, slik eg fekk på gamlebloggen.

Snakkast